Capel y Morfa
Croeso
Ni chynhelir oedfa yng nghapel y Morfa yn ystod yr wythnosau nesaf oherwydd y coronavirus.
Ond bydd modd cadw mewn cysylltiad o ddydd i ddydd trwy negeseuon a fideo drwy'r wefan a thrwy dudalen Facebook, Trydar a Youtube y capel. Cliciwch ar symbolau Facebook a Trydar neu gwyliwch y fideo.
Mae Capel y Morfa yn eglwys fywiog a chartrefol yn Aberystwyth - eglwys sydd yn agored iawn ei meddwl a'i hagwedd. Rydym yn credu yn Iesu Grist fel calon a chanol bywyd y Cristion ac fel ffynhonnell ein hadnabyddiaeth o Dduw. Yr ydym yn ceisio ei ddilyn o ddydd i ddydd gan ddibynnu arno am faddeuant am bob methiant, nerth ym mhob angen ac ysbrydoliaeth ar gyfer pob her.
Un teulu mawr
Ar y Sul
Oedfaon am 10.00 a 5.00
Ebeneser am 2.15
dan ofal y gweinidog Eifion Roberts a phregethwyr gwadd eraill
Wythnos ffoaduriaid
Aeth wythnos ffoaduriaid heibio 15 - 21 Mehefin heb fawr o sylw sydd yn awgrymu rhywbeth am effaith y cyfnod clo arnom. Mae'r newyddion a'n diddordeb ninnau wedi troi yn fwy a mwy mewnblyg. Mae hynny yn ddealladwy oherwydd yr ofn a'r gofid y mae Covid 19 wedi ddwyn yn ei sgil. Ond tra fod Black Lives Matter wedi mynnu ein bod yn sylweddoli fod na anghyfiawnder a hiliaeth yn dal yn fyw ac yn llawer iawn rhy iach, efallai fod angen i ninnau gofio a sylweddoli fod ffoaduriaid yn dal i fyw mewn amgylchiadau dychrynllyd. Mae eraill yn wynebu anhawsterau mawr. Mae na rai yn adrodd stori pobl heb fod ymhell o draethau gwlad Groeg ryw bythefnos yn ôl. Yn ôl yr hanes roedd na ddeugain o bobl mewn cwch yn ceisio cyrraedd glan. Ond ymateb yr awdurdodau gwarchod y glannau oedd curo'r bobl gyda ffyn tra eu bod yn ceisio difrodi peiriant y cwch. Taflwyd ryw bowdr gwyn oedd yn llosgi'r croen atynt, hynny er fod na blant bach ar y cwch. Yna fe adawyd nhw yn y cwch, bellach heb beiriant, mewn haul crasboeth am oriau lawer. Nid oes modd cadarnhau gwirionedd y stori - ond mae'n engraifft o sut mae ffoaduriaid yn cael eu trin. Mae gwersylloedd di-obaith ar ynysoedd gwald Groeg, yn Nhwrci, yn y Libanus a'r Iorddonen a chymaint o lefydd eraill. Pan fo gobaith yn cael ei gipio oddi ar bobl sydd wedi wynebu rhyfel, gwrthdaro, profedigaethau a chartrefi yn cael eu chwalu gwae ni os nad ydym yn colli dagrau Crist dros y bobl. Ond gobeithio bod gennym ddwylo Crist a gennau Crist hefyd, er mwyn gweithredu ar eu rhan. "Yn gymaint a'i wneuthur i un o'r rhai bychain hyn ... i mi y gwnaethoch..."
